
405ཧོར་ཟླ་བཅུ་གཉིས་པའི་ཚེས་བཅུ་ལ་༸རྒྱལ་མཆོག་ཚངས་དབྱངས་རྒྱ་མཚོའི་སྐུ་མཆོད། གསོལ་འདེབས།
47-6-8
༄༅། །ཧོར་ཟླ་བཅུ་གཉིས་པའི་ཚེས་བཅུ་ལ་༸རྒྱལ་མཆོག་ཚངས་དབྱངས་རྒྱ་མཚོའི་སྐུ་མཆོད། གསོལ་འདེབས།
༄༅། །ཧོར་ཟླ་བཅུ་གཉིས་པའི་ཚེས་བཅུ་ལ་༸རྒྱལ་མཆོག་ཚངས་དབྱངས་རྒྱ་མཚོའི་སྐུ་མཆོད། གསོལ་འདེབས་ནི།༄༅། །དག་པའི་ཐུགས་བསྐྱེད་སྲིད་པའི་(༧༣བ) མིག་འབར་བས། །སྟོབས་བཅུའི་འདབ་རྒྱ་གྲོལ་ཡང་གཞན་སྣང་དུ། །རྒྱལ་སྲས་ཆུ་སྐྱེས་གཞོན་ནུའི་ཚུལ་སྟོན་པའི། །ཕྱག་ན་པད་དཀར་འཆང་ལ་གསོལ་བ་འདེབས། །མགོན་དེའི་ཡེ་ཤེས་སྒྱུ་འཕྲུལ་ཆུ་ནང་གི །ཟླ་བཞིན་དུ་མར་འཆར་ཡང་ཨོ་རྒྱན་ཡུལ། །དྲི་མེད་བླ་མའི་ཐུགས་སྲས་བདེ་སྐྱོང་ཡུམ། །དབང་ཕྱུག་དཀོན་མཆོག་འབངས་ལ་གསོལ་བ་འདེབས། །བོད་ཁམས་ཡུལ་དུ་འཕྲུལ་སྣང་གནྡྷོ་ལ། །བོད་ཀྱི་མེ་བཙའ་མཐའ་འདུལ་ཡང་འདུལ་བཞེངས། །བོད་ཡུལ་བདེར་བཀོད་སྲོང་བཙན་སྒམ་པོ་སོགས། །བོད་ཀྱི་ཆོས་རྒྱལ་གྱུར་ལ་གསོལ་བ་འདེབས། །རྨད་བྱུང་ཆོས་དཀར་འཛག་པ་འབྲོམ་གྱི་རིགས། །འཕགས་མས་ལུང་བསྟན་དགེ་བསྙེན་ཚུལ་བཟུང་ནས། །ལྷ་ཆོས་བདུན་ལྡན་བཀའ་གདམས་ཡོངས་སྟོན་རྗེ། །རྒྱལ་བའི་འབྱུང་གནས་ཞབས་ལ་གསོལ་བ་འདེབས། །གྲངས་མེད་ཐུགས་བསྐྱེད་མཆོག་གི་དཔལ་ཡོན་ལ། །བློ་བཟང་གྲགས་པའི་བསྟན་པ་ཉེར་གཏད་ཅིང་། །འདོད་ཁམས་དབང་མོས་ལུང་བསྟན་ཐམས་ཅད་མཁྱེན། །དགེ་འདུན་གྲུབ་པའི་ཞབས་ལ་གསོལ་བ་འདེབས། །མ་བོས་ཌཱ་ཀི་འདུ་གནས་ལུང་གསུམ་ལྗོངས། །རྩོལ་མེད་གནས་ཀྱི་སྒོ་ཕྱེད་དབྱངས་ཅན་མས། །མངོན་སུམ་ཞལ་གཟིགས་འཇམ་མགོན་བླ་མའི་བསྟན། །རྒྱས་མཛད་དགེ་འདུན་རྒྱ་མཚོར་གསོལ་བ་འདེབས། །རྨ་རིགས་ལས་འཁྲུངས་ཟབ་མོའི་ལུང་བསྟན་བཞིན། །རིས་མེད་ཆོས་ཀུན་ཉམས་བཞེས་མཐའ་འཁོབ་འགྲོ། །རིས་མེད་ཞྭ་སེར་སྒོར་འཇུག་ཐུགས་རྗེ་ཅན། །བསོད་ནམས་རྒྱ་མཚོའི་དཔལ་ལ་གསོལ་བ་འདེབས། །ཇིང་གིར་གནམ་རིགས་ཡན་ལག་བརྒྱད་ལྡན་མཚོ། །བསྲུབས་སྐྱེས་
47-6-9
སྐུ་མཆོག་ཀོ་བི་ད་རའི་ཤིང་། །ཆད་མེད་འཕྲིན་ལས་བཟང་པོའི་རོ་བདའ་བ། །ཡོན་ཏན་རྒྱ་མཚོའི་ཞབས་ལ་གསོལ་བ་འདེབས། །ངག་ལ་དབང་ཕྱུག་འཕགས་བོད་པཎ་གྲུབ་ཚོགས། །བློ་གསལ་ཀུན་ལས་ཆེས་འཕགས་སངས་རྒྱས་དངོས། །རླབས་ཆེན་མཛད་བཟང་རྒྱ་མཚོའི་མཐར་འགྲེམས་པའི། །ཁྱབ་བདག་རིགས་བརྒྱའི་(༧༤ན)མགོན་པོར་གསོལ་བ་འདེབས། །སྔ་འགྱུར་ཐེག་པ་པདྨའི་རྫིང་སྐྱེས་ཀྱང་། །བློ་བཟང་གྲགས་སྙན་བསྟན་པ་རིན་ཆེན་གྱི། །གདུགས་དཀར་མཁའ་ཁྱབ་འགྲོ་བའི་གྲིབ་བསིལ་དུ། །འདེགས་མཁས་ཚངས་དབྱངས་རྒྱ་མཚོར་གསོལ་བ་འདེབས། །བསྐལ་བཟང་རྣམ་འདྲེན་ཤཱཀྱ་སེངྒེ་ཡི། །མདོ་སྔགས་བསྟན་པ་རྒྱ་མཚོ་སྤེལ་སླད་དུ། །འཕགས་མཆོག་འཇིག་རྟེན་དབང་ཕྱུག་མི་ཡི་གར། །ལེགས་མཛད་རྗེ་བཙུན་བླ་མར་གསོལ་བ་འདེབས། །རྗེ་བཙུན་བློ་བཟང་རྒྱལ་བ་གཉིས་པ་ཡི། །བསྟན་པའི་དབང་ཕྱུག་འཇམ་དཔལ་རྒྱ་མཚོའི་དཔལ། །བཟང་པོའི་མཛད་པའི་(པས)འགྲོ་བ་འདྲེན་མཛད་པའི། །སྐྱབས་གསུམ་ཀུན་འདུས་ཞབས་ལ་གསོལ་བ་འདེབས། །བློ་གྲོས་བཟང་པོ་བསྟན་པའི་གདུགས་དཀར་པོ། །སྲིད་ཞིའི་གདུང་སེལ་དགེ་ལེགས་འབྱུང་བའི་གནས། །ངག་དབང་ལུང་དང་རྟོགས་པའི་རྒྱ་མཚོ་ཆེ། །མཚུངས་མེད་རྗེ་བཙུན་བླ་མར་གསོལ་བ་འདེབས། །ངག་ལ་དབང་འབྱོར་བློ་བཟང་རྣམ་དཔྱོད་ཀྱི། །འཇམ་དཔལ་སྙིང་པོའི་བསྟན་འཛིན་ཀུན་གྱི་གཙོ། །མཁས་བཙུན་ཚུལ་ཁྲིམས་རྒྱ་མཚོའི་མངའ་བདག་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །ངག་གི་དབང་ཕྱུག་བསྐལ་བཟང་རྣམ་འདྲེན་གཙོ། །ཡོངས་རྫོགས་བསྟན་པའི་གསལ་བྱེད་སྒྲོན་མེ་ཆེ། །མཁས་གྲུབ་བསྟན་འཛིན་རྒྱ་མཚོའི་གཙུག་རྒྱན་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །ངག་དབང་བློ་བཟང་བསྟན་པའི་ཁང་བཟང་རྩེར། །ངུར་སྨྲིག་རྒྱལ་མཚན་སྒྲེང་ལ་མི་འཕྲོག་པའི། །མཁྱེན་རབ་ཟབ་མོའི་ཐུགས་རྒྱུད་ལེགས་གཏམ་(གཏམས་)པ། །འཕྲིན་ལས་རྒྱ་མཚོའི་མགོན་ལ་གསོལ་བ་འདེབས། །ངག་དབང་བློ་གཏེར་བསྐལ་བཟང་ཐུབ་དབང་བསྟན། །རྒྱ་ཆེར་དབྱར་གྱི་མཚོ་བཞིན་སྤེལ་བའི་
47-6-10
སླད། །འཇིགས་བྲལ་ས་གསུམ་དབང་ཕྱུག་ཕྱོགས་ཀུན་(༧༤བ)ལས། །རྣམ་པར་རྒྱལ་བའི་སྡེ་ལ་གསོལ་བ་འདེབས། །བཀའ་གཏེར་གསང་བའི་ལུང་བསྟན་གསལ་པོ་རུ། །ཀུན་མཁྱེན་ལྔ་པས་ངོས་བཟུང་ཐུབ་དབང་གིས། །འོད་སྲུངས་གཏོད་(གཏད)རབས་བཞིན་དུ་ཆོས་སྲིད་བསྟན། །ལེགས་བཟུང་གངས་ཅན་བདེར་བཀོད་བཀའ་དྲིན་ཅན། །བདེ་གཤེགས་དྲི་མེད་རྒྱལ་མཚན་འཛམ་གླིང་འདིར། །མ་འགགས་ཟླ་བཟང་ཐོགས་མེད་འཕགས་པའི་ཡུལ། །ལྗོངས་འདིར་མུ་ཁྲི་བཙན་སོགས་ཆོས་ཀྱི་རྒྱལ། །ལེགས་པའི་ཤེས་རབ་དུས་ཞབས་ནོར་བུ་བཟང་། །མཆོག་ལྷ་འོད་ཟེར་ལ་སོགས་དམ་པའི་ཚོགས། །བཟང་བཟང་བག་ཆགས་ཉེར་བསད་མི་ཡི་དབང་། །མང་མང་རིག་པའི་གསལ་མཁས་པཎྜི་ཏེ(ཏ)། །སངས་རྒྱས་རྒྱ་མཚོའི་ཞབས་ལ་གསོལ་བ་འདེབས། །སྤྱན་རས་གཟིགས་དབང་རྩ་བའི་བླ་མ་ལ། །ལ་འུར་གསོལ་འདེབས་བདག་སོགས་གདུལ་བྱའི་ཚོགས། །ཚོགས་གཉིས་རབ་རྫོགས་ཐུགས་རྗེའི་བྱིན་བརླབ་རྒྱུན། །རྒྱུན་ཆད་མེད་པར་མྱུར་དུ་འཇུག་པར་ཤོག །ཐུབ་པའི་བསྟན་པ་མཐོ་རིས་སྐྱེད་མོས་ཚལ། །འཇམ་མགོན་བླ་མའི་རིང་ལུགས་དཔལ་གྱི་དྲིས། །ས་གསུམ་ཀུན་ཏུ་ཁྱབ་པ་དགའ་ལྡན་པའི། །ཕོ་བྲང་ཆོས་སྲིད་མངའ་ཐང་རྒྱས་པར་ཤོག །གང་གི་བཀའ་ཁྲིམས་ཉི་མོའི་སྣང་བ་ཡིས། །ལེགས་ཁྱབ་འཛམ་གླིང་སྤྱི་དང་ཁྱད་པར་དུ། །བསིལ་ལྡན་ལྗོངས་འདིར་འཐབ་རྩོད་མི་དགེའི་མུན། །རབ་ཞི་རྫོགས་ལྡན་པདྨོ་བཞད་པར་ཤོག །སྐྱེ་བ་ཀུན་ཏུ་ཡང་དག་བླ་མ་དང་། །ཞེས་སོགས་བརྗོད། ཅེས་པ་འདི་ནི་དཔལ་ལྡན་འབྲས་སྤུངས་སྤྱི་སོ་སོགས་ནས་མཆོག་དམན་ཀུན་གྱིས་ངག་འདོན་དུ་བྱས་ཆོག་པ་ཞིག་ཕྱི་ལོ་ནག་ཆུང་ཁྱད་འདི་ལོ་རང་དགོས་ཚུལ་(༧༥ན) ནན་གྱིས་བསྐུལ་བ་ལྟར་སྨྱོས་རིགས་ཀྱི་སྡོམ་བརྩོན་བློ་བཟང་རིན་ཆེན་ཚངས་དབྱངས་རྒྱ་མཚོས་ས་ཡོས་སྨིན་དྲུག་ཟླ་བར་སྦྱར་རོ།། །།༼དཔེ་སྒྲིག་པའི་མཆན། གསོལ་འདེབས་འདི་ཉིད་ཀྱི་མཇུག་བྱང་དུ་༸རྒྱལ་མཆོག་ཚངས་དབྱངས་རྒྱ་མཚོས་མཛད་ཚུལ་གསལ་བར་འཁོད་ཀྱང་། སྐུ་ཕྲེང་བདུན་པ་ནས་བཅུ་གསུམ་བར་ལ་བསྟོད་ཚིག་ཤོ་ལོ་ཀ་རེ་དང་། དེ་རྗེས་ཆོས་རྒྱལ་རིམ་བྱོན་དང་། སྡེ་སྲིད་རྒྱ་མཚོ་སོགས་ལ་བསྟོད་ཚིག་ཤོ་ལོ་ཀ་དྲུག་བཅས་འཁོད་པ་རྣམས་དུས་ཕྱིས་ཁ་སྐོང་གསར་བཅུག་གནང་བ་གང་ཡིན་ཆ་མ་འཚལ་བས་དཔྱད་པར་འཚལ་ལོ།།༽


